噚日係美斯嘅31歲生日，不過阿根廷出線形勢水深火熱，睇怕球王都冇乜心情慶祝。周二D組煞科日大戰尼日利亞當前，據報以美斯為首嘅一班阿根廷球員，之前逼宮主帥森柏奧利雖然唔成功，但都唔會畀佢好過，實行架空佢，煞科戰阿根廷嘅正選陣容，會由球員自己決定，即係美斯話事。
同馬斯真逼宮失敗
阿根廷喺今屆世界盃暫時得一分排包尾，周二對尼日利亞要全取三分先可能晉級16強。不過呢場生死戰賽前，阿根廷陣營俾人睇到嘅唔係團結一心，而係內訌。據報以美斯同馬斯真蘭奴為首嘅一班球員，喺輸畀克羅地亞之後，曾要求足總即時將森柏奧利辭退，由技術主管、1986年世盃奪標功臣布魯齊加接手，不過足總方面已經拒絕咗。
森帥筆記洩露天機
美斯幫逼宮不遂，都冇打算再聽森柏奧利指揮。另一位阿根廷86年奪標功臣古斯迪透露佢同布魯查加傾過偈：「我同布魯查加傾過，對尼日利亞一戰會由球員自行決定排陣。森柏奧利到時可以繼續坐喺後備席，如果唔出現亦冇問題。」
唔知係咪已經心灰意冷，森柏奧利喺上周六操練嘅時候，被傳媒影到佢拎住嘅戰術紙，唔小心洩露軍情。阿根廷周二對尼日利亞許勝不許和，將戰術公開隨時累球隊出唔到線，森柏奧利隨即遭受到傳媒狠批，不過到底佢係乜嘢心態，真係要佢自己先知。
由森柏奧利嘅筆記可見，佢打算安排阿根廷進行七對七嘅練習賽，一邊球員有安沙迪、法斯奧、盧施素、麥斯美沙、保羅戴巴拿、基斯甸柏禾同埋阿古路；另一邊就有伊度亞度沙維奧、馬高斯盧祖、達利亞費高、馬斯真蘭奴、迪馬利亞、希古恩同埋安素佩雷斯。美斯呢？兩邊都冇份。
