年前有位口大食四方的朋友約飯，我一聽地點是平日望門興嘆的高級食肆，不禁面露猶豫之色，他見狀好心好意補上一句：「勿擔心，間嘢其實好casual，唔使着靚衫㗎。」雖然實情係怕他太破費，無功不受祿，以身相許更累他賠了夫人又折兵，但camp精果然沒有枉擔虛名，想也不想便答：「咁點算好？我衣櫃冇唔靚嘅衫㗎噃！」莫怪我牙擦擦，此乃冇花冇假的實情，時尚低端人品味或許平庸惡俗，「時戴令」或許極度需要Tomas Chan仗義拔刀相助，然而周遊列國濕平的時候，誰不是擇靚而買，唔通千揀萬揀，專登揀件肉酸核突嘅至去碌卡咩？就算那些遠遠見到令人打個突的土豪大媽，名店揮霍幾廿萬落得周身廟街feel，我都願意相信他們並非帶着「留番啲靚衫畀第個買」的謙卑之心掃貨，只不過信奉的愛美神不是你和我參拜的一個。
天地良心，每個人囤積的衣物，都是自己心目中的靚衫，所以特朗普老婆孭住「我真的不在乎，你呢？」造訪被逼與父母隔離的小人蛇，第一大疑問不是點解佢個心咁黑，而是衫從哪裏來。照阿美利堅國母平日衣着的風格看，非富則貴的衣櫃不是擲地作聲的D&G就是香噴噴的華倫天奴，究竟為什麼角落會藏住一件三十九美元的高街連鎖店賤物，而且不是應季熱品，而是兩年前的舊貨，真值得福爾摩斯們掏出放大鏡研究。莫非俄國網絡黑客入侵真實生活，變戲法一樣攝了件陷她於不義的外套在名牌堆中，趁佢病攞佢命？抑或扮潮童扮到走火入魔，連目不識丁也一併學埋，視背後大字為圖案設計？