呢排唔少人將旺角騷亂同六七暴動作比較，令到唔少人想了解更多六七史實，咁就係時候要重溫紀錄片《消失的檔案》。導演羅恩惠訪問咗當年嘅左派領導、炸彈隊成員、工會領袖同警務人員等等，又以歷史文獻還原真相，之前喺社區巡迴播映逾200場，好評如潮，最近終於製成DVD，7.1喺影音店全線上架，等市民可以帶返屋企慢慢睇。
法政匯思賣遮撐法治
揀得對港人意義重大嘅7.1上架，似乎別有一番心思，呢隻DVD不單有社區公映時未曝光片段，又有名人推介，仲送尊子嘅漫畫卡片，原價$109，7.1特價$100。
驚住7.1要去參加民陣大遊行，冇時間行街買DVD？呢樣大家唔使擔心，據知《消失的檔案》屆時會借用「眾新聞」7.1街站出售DVD。
另外，去年賣過毛巾嘅法政匯思今年則喺7.1出售雨傘，淺藍色傘面印住錢鍾書詩作《沉吟》嘅一句「詞嚴義正宅心寬」，每把盛惠$150，目的好明顯啦，就係同大家喺捍衞法治方面繼續撐。
李八方