「青蛙思想保守，不思進取，坐井觀天，是負能量，而癩蛤蟆思想前衞，想吃天鵝肉有遠大目標，是正能量」。呢段文字曾經喺網上流傳，其實青蛙同俗稱「癩蛤蟆」嘅蟾蜍性格係咪有分別，真係天知曉，但係外觀就真係有好大唔同。
蟾蜍外形呈橢圓，背部顆粒凹凸不平，大部份耳後有毒腺，分泌經皮膚接觸嘅話對人體無害，不過如果誤當青蛙食落肚嘅話就可能中毒。蟾蜍脫落嘅皮膜即係中藥材蟾衣。
蟾蜍四肢粗短，前肢比較發達，有助爬行，雖然係陸地生活，但就要喺水中產卵，卵會喺水中發育成蝌蚪，不過今次周小姐搵到嘅溫室蟾就唔會經過蝌蚪期。
青蛙皮膚比較光滑同濕潤，俗稱田雞嘅虎皮蛙，就係青蛙嘅其中一個品種，青蛙四肢纖細，後肢較發達，擅於跳躍，動作較蟾蜍敏捷。而兩者都係兩棲動物，天敵同樣係蛇。