前特首梁振英卸任後真係好得閒，最近幾乎每日都喺fb出po，唔係鬧《蘋果》就係批評民主派，早幾日仲攞埋美國嘅事例嚟教大家，新聞、言論、學術、表達意見自由「不是絕對價值」。既然佢咁有見解，大家又睇睇佢出席嘅一個論壇係點樣對待傳媒。
梁振英出席咗「2018年亞布力青年論壇創新年會」。主辦單位就要求到場採訪嘅傳媒簽一份聲明。八方真係聞所未聞，乜去做採訪都要聲明？咁使唔使宣埋誓、打埋手指模兼抄低身份證號碼呀？點都好，即管睇咗份聲明講乜先。
第一點話某啲活動唔採訪得，ok，邊啲可以採訪、邊啲唔得，主辦單位有權話事嘅。第二點係唔可以約「特殊嘉賓」亞布力中國企業家論壇名譽主席劉明康做訪問兼且唔可以報道佢，咁就搞笑啲咯，明明去咗論壇又唔報道得，唔見光咩？
第三點就最精彩，佢哋要求記者嘅報道出街前，要先畀亞布力論壇新聞中心審核，同埋如果做live或者圖文直播期間，啲嘉賓講錯嘢，就要幫新聞中心做好修改、刪除、出聲明等嘅處理工作。乜講到咁白呀？寫到明要做「審核」，咁不如唔好叫記者去，自己圍威喂搞完個論壇出稿算啦﹗再者啲嘉賓個個都係成年人，講錯嘢唔使負責任㗎？仲好意思要人哋幫佢兜、幫佢哋執手尾，無嘢吓嘛？定係佢哋驚梁振英又講錯嘢搞出個大頭佛呀？
個聲明仲有第四同第五點嘅，不過都不值一提。真係想請教下梁振英，要傳媒簽啲咁嘅聲明嘅活動，係咪先為之符合佢心目中，新聞自由只係普世價值、唔係絕對價值呢？