WhatsApp霸主不死身
撰文：盤古目
其實平時用落WhatsApp冇乜話好或唔好，主要是用慣了，身邊的人用慣了，咪繼續用囉。
其實2016年時，當WhatsApp落實和Facebook共享資料時，當時曾經發起將所有通話群組撤離WhatsApp，因為當時見到在WhatsApp上顯示的通告，表示在某某日後若果你不反對新的分享條款，咁就代表你同意分享，咁都得？如果我好日唔用你，隔一排先用，咁我就自動入冊？若果我老懵懂，連陳生姓乜都唔知，咁我以後又要自動俾你監察？心想佢咁唔尊重用家，罷用！於是大舉邀請各群組朋友搬家，幸得各位理解信任，絕大部分群組都成功撤離；可憾是，仍有大幫人馬是一動不動，分享資料？冇問題！對搬家、用新嘢，即是登記多一個對話App十分抗拒。
習慣是怎樣育成的呢？在電腦界中，這情形的最大受惠者當然是微軟，自九十年代Windows PC成為第一個普及年代的系統，地位固若金湯，甚麼電腦病毒、千年蟲、死機都不害其身，仍然受萬民擁護；一「窗」定天下，微軟印銀紙咁印，就連功能麻麻的IE瀏覽器亦可成為互聯網霸主。微軟一度成為全球最有價值科技公司。
現下WhatsApp有如這年頭的視窗、IE，成為第一個手提年代對話App後，儘管大家都可能遇到換機冇晒對話紀錄，死server等問題，甚至在用戶條款上不斷踩界，大家都安於現狀，理得佢有問題，成日壞，繼續日日搭地鐵。
大家不妨發掘一下新一代對話App，如Telegram的好處，包括：
雲端對話：對話歷史存於雲端，而不像WhatsApp存於手機，可同時在不同電話、平板及電腦接收訊息，例如返到屋企可以放低電話充電，舒舒服服對住個大Mon Pad。換電話時，就算你由Android轉iPhone所有對話都自動從雲上歸來。
小機械人程式（Bot）：小程式方便分享更多不同類型內容，例如今晚去邊間餐廳食飯，可以加入投票程式；類似的有rating Bot、LikeBot。網上有類似App Store的地方安裝不同Bots。
超級群組：單一群組可容納達3,000人，相對WhatsApp的256人多。
卡通Stickers：有官方現成、亦可自製Upload。
只是，這就是社會，大家都過著習以為常的日子。結果，就算換電話，咪又係焗住要裝返個WhatsApp。真希望大家會事事想點解，例如點解唔試新嘢，點解要交稅養宦官？