【記者梁智威俄羅斯直擊】跟隨now TV率領的世盃採訪團來到莫斯科，轉眼已經四天，其間不斷被香港的朋友同事們追問我︰「俄妹索唔索？」講真，個個民族都有靚女有醜女，硬要把俄妹說成地球上最索，我情願相信俄妹是地球上最具戰鬥力的女人。
Russia，俄羅斯，古稱羅剎國，上海文士雅興之至，把俄國菜餚稱作「羅宋大菜」，一聽就知係「鍾郭菜」個friend了。《西遊記》話羅剎女係牛魔王個老婆，再加入埋鳥山明《龍珠》講法，亦即係孫悟空個外母。咁大家諗吓，一個能同時收服牛魔王與孫悟空嘅女人，若非具有強大戰鬥力，一早死咗啦，吓話？
好明顯，以上純粹爛gag，小記為了老友，刻意在紅場附近遊弋。結果在緣份交織下，捕捉到幾位最上鏡俄妹，更與其中三位攀談自拍，算是交了功課。咁你話相中俄妹索唔索？託now TV鴻福，呢三位的確係小記四日以來，喺莫斯科遇過最索嘅俄妹。
好了，眼睛飽了，還要醫肚，小記跟大隊品嚐so-called最正宗的羅宋湯。咦喂？個湯咁重口味嘅？既濃且酸，既紅又偏紫，重口味偏又不辣，跟香港的羅宋湯差天共地。
其實任何國外文化傳入任何一個「本土」，很容易就會衍生出既有別於傳統，卻又一廂情願的憧憬，久而久之就成為了另一種味道。正如俄妹，香港老友甘之如飴，你話唔索咩？唔係！你話好索咩？又唔係全部係。都係嗰句，一竹篙，邊打得晒一船人？