有咩慘得過世界盃捱夜睇波？咪就係冇得睇波囉！星期四上演嘅法國對秘魯世界盃C組分組賽，由now TV提供收費直播，不過正當大家都開定包薯片坐定定等睇波嗰陣，先發現無論係now E個App定係機頂盒都一律冇晒畫面，一眾球迷即刻李香琴上身高呼︰「冇電視睇呀！慘無人道世界末日喇！」畀咗錢睇世盃嘅球迷梗係不滿，即時喺網上社交平台轟炸留言，但有關方面竟然一度刪文更加令球迷嬲嬲，好彩電視台知衰總算補鑊，安排法國場波同埋之後阿根廷對克羅地亞場波，都喺佢哋個免費頻道播。但客戶畀咗錢點知場波會喺免費台播，可能都係不是味兒。
技術性問題冇波睇
今屆世盃原本由樂視做獨家直播，樂視喺三月關門大吉，now除咗接手英超直播之外，亦有傳後者早喺上年11月已由樂視買咗俄羅斯世盃播映權。當然，球迷要睇齊64場世盃賽事，就要另外畀錢啦。周四世盃頭場丹麥對澳洲喺免費台播人人有份，之後兩場原本係畀咗錢嘅客戶專享，點知突然出現技術性問題，冇得睇。
曾刪除網民投訴留言
冇波睇球迷梗係唔高興，喺now E嘅Facebook網站，好快就有超個300個留言投訴，有啲寫「睇唔到，睇唔到，睇唔到」，亦有「又話睇晒64場，呢場點賠」。最弊係有關方面嘅處理，管理員起初將部份留言刪除，引起更大嘅不滿，《蘋果》讀者梁小姐仲同我哋投訴有關方面處理手法唔係幾理想：「now E由23:13到𠵱家都完全冇世界盃畫面，app個主頁就咩都冇，好多人網上投訴就刪留言，我畀錢買個Plan返嚟搞成咁真係火。」
又搞到關公，有關方面最後都要承認now E故障正在搶修，兼且道歉，之後亦都盡力補鑊，到法國場波就完場嘅時候，安排去免費台播埋剩番幾分鐘，兼安排埋半夜阿根廷對克羅地亞嘅比賽都喺免費台播，叫做平息吓大家不滿，至於畀咗錢嘅客戶會唔會得到任何形式嘅賠償，就有待觀望。翌日now E嘅公關回覆就事件再一次道歉。