球迷阿桂睇完波，傳來一則廣東話笑話，又幾正噃，但阿桂有冇咁醒，識寫笑話呀？還是選材自互聯網上之傳言、留言？無論出處如何，阿桂呢個笑話都值得再抄一次，振一振廣東話聲威。
阿桂講：一個英國球迷保羅想學講廣東話，第一個字係杯啤酒幾expensive，expensive用廣東話點講？阿桂話：expensive即係「貴」，英文拼音係kwai。保羅問：「擺酒杯嘅cupboard叫做乜？」阿桂答櫃kwai。酒櫃上有一隻膠製tortoise，中文係乜？阿桂答：「咪係龜kwai囉！」
保羅聽咗一連串kwai，有啲反應遲鈍嘞，加上飲咗幾杯，腳步不穩，幾乎跪低，於是問kneel點講？阿桂答：跪kwai，又係kwai？保羅開始有啲火氣，再問「你見ghost呀！」阿桂答ghost叫做鬼kwai，保羅服晒咯：「香港人叫我地英國人做乜？」阿桂答：「鬼佬。」保羅卒之投降：「全部都係kwai，廣東話咁難學，唔學嘞，哎，你叫做乜嘢名話？」阿桂答：「阿桂囉kwai。」
貴櫃龜跪鬼桂，全部唔同意思，教鬼佬發音，就幾乎全部相同，又真係好難掌握嘅。廣東話如果唔係從小學起，即使係中國人（如無錫人、寧波人）要學，幾十年都學唔到，聽吓金庸先生講廣東話就知道。
沙田陳太嘅孫女讀所謂「國際幼稚園」，用英語及普通話教學，讀中文書要用普通話讀，好處係孫女嘅普通話發音幾標準，至於英語，因為香港幼稚園女孩人人都係「公主」，係Elsa，男孩係Peppa Pig，睇得英文卡通片多，同學可用英語交談，於是沙田陳太反而驚孫女唔識用廣東話讀書，在家要孫女背唐詩（牀前明月光，慈母手中綫，諸如此類），又要將孫女（讀K2）之中文課用廣東話讀多一次。左丁山見到都戥佢辛苦，問：「細路女係咪壓力好大？」陳太話：「冇喎，日日跳跳紮，都唔知幾輕鬆。」呢個例子或者可以說明，幼童自小學語言，比成年先至開始學習外語容易得多。學寫字呢？左丁山問陳太：「哈囉名校話要教簡體字噃，你有冇跟風？」陳太答得妙：「我從來冇學過簡體字，以前睇人民日報一啲困難都冇！啲鬼佬以為簡體繁體係兩種中文，於是唔駛問阿桂，西瓜靠大邊，一於教中國大陸簡體字，表明係佢地唔識。識繁體易學簡體，先學簡體，讀古書就麻煩。希望本地中小學唔好跟風啦！」