昨日講到亞洲波無明天，相信一定有人覺得不服氣，強國人更加唔高興。習主席嘅中國夢有好多內容，足球夢係其中之一。一位朋友叫阿桂，到加路連山道南華會之Inn Side Out吃飯兼睇波，佢話情況好熱鬧，睇波氣氛又好，係世界盃期間一個好去處。平時聽醫生陳講，因佢之醫務所在銅鑼灣，日常收工後就去Inn Side Out嘆吓Happy Hour，鬆一鬆，一個禮拜梗有一次與家人在Inn Side Out吃晚飯，現在到咗世界盃期間，佢家人可能會被球迷擠出了。 阿桂話有不少外國朋友同佢講波經，講到亞洲足球，大家意見多多，一位英國人保羅飲咗兩杯後，對阿桂講：「唔怕得罪，我見到我個仔間國際學校有好多香港學生，佢地好少鍾意打波嘅，香港家長鍾意要仔女考做IB狀元，邊度肯畀個仔踢足球，練足球呀。英國大部份球星都係十歲八歲，或者更早就入正規足球訓練班，12、13歲有少少潛質就會畀曼聯阿仙奴青訓班招攬，香港與中國冇呢個足球培訓文化系統箒。」阿桂當然同意呢個觀點，中國人及亞洲人家長，極度重視讀書考試，邊度肯畀仔女為咗足球而放棄學業做「波牛」？中國奉行一孩政策已久，家有一子就視之如珠如寶，香燈繼後有人，更加要培養成為高考狀元㖭，踢乜嘢波呀！東亞文化就是如此，幾難培養出尼馬，C朗呢類足球天才。 南美球星又點？南美國家多窮人：窮孩子冇電子遊戲機冇手遊，最便宜快樂活動就是在街上踢足球，踢得好便加入分齡足球比賽，表現好嘅話就會畀球探揀中送入大球會青訓班。阿桂話：「我地細路哥時見到嘅球星好似朱永強，後來嘅黃文偉，張耀國等就係在街頭踢波，在修頓麥花臣小型球場成名而直上甲組的，現在怕冇呢支歌唱咯。」冇嘞，中日韓三國都比較富裕，有深厚讀書文化，基本上係足球球星沙漠，冇得好怨，是故亞洲足球無明天，永遠都係世界波之二線或三線隊伍。阿桂話有一位朋友不服，在Inn Side Out與保羅爭辯：「我地乒乓女排羽毛球有世界級球星呀，打贏全世界！」保羅話：「原諒我大膽啲講，乒乓女排羽毛球都係歐洲南美北美嘅冷門運動，我地少人玩，中國人叻晒亦無妨，講到大眾運動例如男女網球！中國球星在那裏？」阿桂聽出火藥味，立即叫停，對保羅講「不如我教你幾句廣東話，大家更加方便溝通啦！」