四年一度嘅世界盃開打一星期，唔少強隊表現令唔少球迷跌眼鏡，亦因為咁坊間出現唔少「明燈」，其中俾網民恥笑燈力驚人嘅，非民建聯莫屬！民記喺facebook出post話撐阿根廷、德國，結果兩隊俾佢燈到冇得贏，日前民記再出招，今次唔敢講到明撐邊隊，但重點講G組英格蘭同比利時，議員各有心水，「究竟𠵱兩隊可唔可以一齊雙雙出線呢？」但真係講還講，唔該唔好出相，一出就出事！
阿鼎認衰：有少少認識都知錯
八方發現個post出咗支英格蘭旗，但支旗個紅十字唔喺中間，而係同民記一樣偏左嘅！公民黨楊岳橋嘅「810扮工室」fb專頁亦出post寸「連人哋支旗都搞錯仲話撐」，解釋埋英格蘭旗上的紅十字Saint George's Cross應該喺正中央。有網民留言話民建聯侮辱人哋國旗，又質疑係咪特登㗎。
其實民建聯自己都直認係明燈，喺fb寫明「燈神忠告：燈神唔怕做，最緊要唔賭」，根據張圖擺位，周浩鼎、劉國勳、張國鈞就企英格蘭嗰邊，何俊賢就企比利時嗰邊，咁樣玩法，搵一啲議員撐一隊，另一啲就撐對手，就唔使俾人話明燈喇，真係好無敵呀！
八方今朝問過阿鼎，佢一見到個post都非常驚訝，直言「有少少認識都知係錯咗」，會即時通知同事更正，佢更加主動認錯：「係我冇睇清楚深感抱歉。」講到世界盃，佢話撐硬英格蘭，事關自己本身喺英國讀書，情有獨鍾喎。
李八方