噚日喺互聯網同WhatsApp群組瘋傳兩張相，一張係一個着黑色T恤、牛仔褲男人在交通燈過路處前面，攞住個file夾，似乎喺度向一位女士抄低資料；另一張係黑衫男企後，前面有個着白T恤、牛仔褲、粉紅色波鞋女人正阻止一位阿伯過馬路。網民看圖識字，話對男女係便衣警察，喺街頭向亂過馬路巿民抄牌發「牛肉乾」，仲講到似層層話交通部6月中開始用便衣警察捉亂過馬路嘅人。
小記再睇吓網上有好多留言，對便衣警捉亂過馬路讚成同反對意見都有，例如「警力過剩」、「咁亂過馬路又係唔啱嘅」、「呀SIR係陰濕啲，但守燈號過馬路有幾難先？」、「唔罰多啲邊有咁多錢幾十億幾十億咁比港鐵吖」。
警：宣傳教育冇票控
小記問過警察朋友，佢哋就話一般嚟講，便衣警係唔會做發告票工作，就算幫手捉亂過馬路或者垃圾蟲，告票都係會由軍裝同事發出。小記再向警察公共關係科查問，佢哋回覆話新界北總區交通部人員，噚日喺區內嘅行人過路處提醒市民注意道路安全。消息話行動中警方只係向巿民宣傳教育，並冇發出牛肉乾。