有「金刀梁」稱號嘅外科名醫梁智鴻，出年就踏入80歲做「八十後」，但依然相當有魄力，唔只操刀做手術，最近仲同有線財經資訊台合作拍攝節目《金刀會客》，邀請老朋友上嚟傾吓偈，幫社會問題斷症。嘉賓名單相當有份量，聽晚播出嘅第一集有梁智鴻細佬、醫管局主席梁智仁。
新節目請細佬講家事
兩兄弟分別做過醫管局主席，阿哥引入急症室收費，細佬就推急症室加價。梁智仁話，急症室收費由100蚊加到180蚊已見到成效，非緊急病人跌5%至大約六成，嚟緊希望可以再跌到五成左右。梁智鴻就話，節目唔會淨係講嚴肅嘢，都會傾「家事」，例如細佬朝朝都同愛犬一齊行山咁吖，分享健康生活。
其餘嘉賓仲有行政會議召集人陳智思、工聯會榮譽會長鄭耀棠，同埋傳過同梁智鴻意見不合嘅港大前校長徐立之。有指徐立之2011年不續任，係俾當時嘅校委會主席梁智鴻勸退。事隔七年喺傳媒飯局被問到呢段往事，徐立之笑笑口話，唔啱傾係「大家講嘅啫」。