男性球迷之間，好多時都鍾意攞自己嘅身體做賭注，例如英國球迷就鍾意輸咗紋身、香港球迷就鍾意輸咗「捨棄」自己身體嘅某部份，不過成日都係得把口。前日本女子國家隊國腳丸山桂里奈，就大膽預測日本會喺今屆分組賽三戰全勝，唔得佢就喺電視節目露股，唔知呢位日本靚女又係咪得個講字？
預測失敗即現場露股
35歲嘅丸山桂里奈係前日本女子足球隊成員，因為成日都有大膽驚人嘅言論而爆紅。已經退役兼且投身藝能界嘅丸山，日前就出席電視台一個世盃節目做嘉賓，喺節目中佢被問到對日本喺今屆世盃嘅展望，當時日本仲未同哥倫比亞對賽，丸山已經話日本贏硬：「日本無論個人能力同組織力都非常出色，我覺得好有機會可以首名出線。」佢仲話哥倫比亞過往喺星期二進行比賽嘅戰績麻麻，對日本非常有利㖭。
丸山仲喺節目度預測，「藍武士」可以喺小組三戰全勝出線，如果預測失敗就會當眾「露股」，賭咁大？不過日本喺星期二對哥倫比亞嘅首場分組賽又真係順利贏波喎，唔知花生友想唔想丸山嘅「全勝宣言」開口中？不過節目播出後，一班日本網民就似乎唔太想丸山找數喇。有網民就話，丸山曾經因為日本國腳身份獲頒榮譽國民獎，唔應該做出一啲咁低俗嘅行為貶低呢個身份；仲有人話丸山今次「借足球上位」嘅做法太cheap。
言論出位男友一籮
丸山嘅言論其實一向出位，早喺上年嘅一個八卦節目，丸山就爆出自己曾經同一個超級出名嘅男明星拍拖，仲大爆一晚唔只上演「帽子戲法」，而係「大四喜」。雖然丸山冇公開呢位前男友嘅身份，不過日本八卦雜誌就話呢位男明星喺日本著名演員佐佐木藏之介。丸山仲透露過自己曾經同過其運動員同足球經理人拍拖，仲話所有ex都有佢嘅裸照喎，所以今次輸賭「露股」對佢嚟講其實係碎料啦！
