今年4月立法會「一地兩檢」法案委員會開會期間，白鴿黨議員許智峯喺會議室外，涉搶走一名政府「狗仔隊」女職員手機，事件引起軒然大波後，建制派當然唔放過任何機會狙擊許智峯，今日會就早前由新民黨主席葉劉淑儀提出，譴責許智峯的議案成立調查委員會跟進。
Miss Mo料被踢出局
由於報名參加委員會的議員多達八人，超過委員會限定嘅七人，所以今日將會進行選舉，其中建制派共派出五人角逐，包括工聯會麥美娟、民建聯張國鈞、自由黨張宇人、謝偉俊同謝偉銓。民主派則派公民黨郭榮鏗、專業議政梁繼昌同埋議會陣線Miss Mo毛孟靜三人出選。
八方聽聞，建制派已經有共識，推舉早前多次高調炮轟許智峯的麥美娟做主席，由於泛民只獲分配兩個委員席位，所以建制派一定要踢走一個泛民，喺議會抗爭較激嘅Miss Mo，相信極有可能俾建制派踢出局。