一年一度嘅香港動漫電玩節將會喺下月27至31日喺會展舉行，過去年年都有動漫迷通宵排隊希望買到心頭好，今年動漫節推出全新登記排隊制度，下月23日提早為頭500個入場觀眾實名登記，成功登記者可憑頭籌卡，第一日朝早就可以按編號順序進場。
實名登記下月23日喺麥花臣場館進行，朝早9點開始登記，要用姓名、身份證頭四位數字同埋手機號碼登記，仲要即場掃描容貌以作辨識。攞到嘅頭籌卡只限登記者自己用，過唔到容貌辨識就入唔到場喇。
香港動漫電玩節行政總裁梁中本就話，過去幾年因出現排隊黨，取消咗現場發售限量版嘅安排，今年將會重新推出，所以搞實名登記兼且用埋容貌辨識，咁就冇得炒籌啦。