今年七一建制派又搞大龍鳳，玩規則霸咗個維園足球場嚟搞大灣區展覽不在講喇，佢哋喺地區搞嘅大大小小慶回歸活動超過130場，其中有個活動叫做「首屆粵港澳大灣區全港青少年抖音公開賽」。你唔知乜嘢叫抖音唔出奇，咁只係證明你並非強國人，但慶委會執行主席鄭耀棠都話唔知，係咪不該先？
棠哥噚日開記招宣佈慶委會嘅七一慶回歸活動，新界社團聯會副會長陳平就話，過百場地區活動中包括嗰場抖音公開賽。陳生自認唔識用抖音，之但係佢知道喺內地非常流行，比賽題目就係用抖音拍條15秒長、宣傳祖國發展同大灣區前景嘅片。八方又問吓棠哥識唔識用抖音，佢直認自己年紀大，唔識呢啲新潮嘢，反而佢就識「呼麥」。呼麥其實係內蒙古一種唱歌方式。果然，八方同棠哥係兩個世界嘅人。