【本報訊】金像電影《樹大招風》道具領班張偉全，因管有22.3萬張拍戲時用的道具鈔票，被控保管偽製紙幣罪罪成，上月底判監4個月，緩刑兩年，引起業界不滿。昨晚香港電影工作者總會發新聞稿，表示金管局已同意簡化申請程序，以及增加中文網頁申請渠道。
指電影逼真才好看
對於金管局同意簡化申請程序，當中有12項較清晰指引，包括：道具鈔票面積必須比真鈔小或大20%以上；電影或電視製作公司的名稱需顯眼地印在道具鈔票的正面及背面等等。香港電影工作者總會永遠榮譽會長吳思遠昨日接受電話訪問，講明「唔收貨」，他認為電影是特殊行業，又用刀槍、又爆炸又撞車，在現實中全部犯法加上拍戲用的警察委任證、口供紙、警車車牌全部都有機會被控告，但電影界追求的是逼真，電影才好看，所以電影發展局同電影服務統籌科，需要想一個折衷方法處理。吳思遠又踢爆金管局聲稱曾有4部電影申請過用道具銀紙被拒：「其實佢哋一路都拒絕，電影業拍咗咁多年戲，用過咁多道具銀紙，到底邊一部係你批准嚟用嘅？」
黃秋生昨回覆本報：「淨係要比真錢小或大20%，同埋要係正面背面印上明顯道具兩字，就已經唔使拍啦，拍戲嘅要求水準㗎？你估仲係粵語長片年代，髹黑隻手當槍咩？即係如果拍爆炸，唔准有煙唔准有火唔准有聲，咁點爆？」導演彭浩翔就表示一面印「道具」已足夠，但要大或者細20%呢個係「戇×」行為，在戲中會穿崩。