【疏忽照顧7歲女案】
【本報訊】女童林林遭疏忽照顧案，庭上爆出林林非男被告親生女兒，一家人關係撲朔迷離。男被告凌耀忠母親向《蘋果》親述前新抱王榮汶來港後的種種惡行，更指事發前從未見過林林一面，首度見面已是在醫院，親睹林林傷勢感心痛，形容林林母親是「毒婦」，「即係……虎毒都不食兒吖」。
記者：李啟發 龔蕙芝
凌耀忠母親憶述第一次在醫院見到卧床毫無反應的林林時，「摸吓佢隻手，完全冇肉，個膊頭平㗎，得一條骨，再摸到大髀，冇肉㗎，再睇隻腳，兩隻腳趾公一條棍咁，對腳直情冇肉㗎……全部下身都爛晒」，表示慘不忍睹，當時才得悉林林的存在。後來獲醫生告知林林大腦受損，現時只可靠插喉餵食，由於十分同情林林遭遇，其後與兒子定期到醫院探望她，惟林林情況不樂觀。
「搵阿仔做踏腳石嚟香港」
年屆八旬的凌母在青衣公屋寓所受訪，大數前新抱王榮汶惡行，表示早知王嫁來港另有目的，王跟兒子凌耀忠相處不足半年就分開，「係搵阿仔做踏腳石嚟香港」。她記得2012年10月某日，兒子突然介紹王榮汶給家人認識，「去到荃灣（酒樓）就見到一個細路（凌耀忠與王的幼子），4、5歲，仲有一個女人坐喺度」。凌母當時以為該女子是兒子朋友妻子，怎料兒子卻問她知不知道男童應如何稱呼他，「我話梗係叫你做伯伯啦，佢話唔係呀阿媽，我係佢爸爸」，凌母才驚悉兒子已成家立室。
數日後，王婦帶同孖女和兒子搬來青衣公屋同住，起初眾人相處和睦，但王不久就露出真面目，嫌棄凌耀忠窮困，又要求將凌耀忠在公屋戶籍除名，以便獲得更多政府資助，但凌耀忠遷出後卻不獲新居鎖匙，最終只好返回青衣家住。凌母認為兒子性格「儍儍哋、俾人蝦」，被女色所迷。
王疑稱「公安都叫我潑婦」
凌母透露，兒子從未試過戀愛，是個處男，直至2003年隨朋友到汕尾認識王榮汶，當時她已提醒兒子「如果有鞋仔屐仔（子女），就會有手尾跟」，惟兒子仍與王婦搭上。
凌母對王榮汶評價極差，直指她從不尊重凌耀忠，又不時向她出氣，「日日都搵我嚟鬧，手指篤篤咁篤到上面」，甚至連她的生活也要管束，有一次凌母生病，「想食塊餅乾都唔准喺（廳）度食，（要我）入去廁所食，咁得人（驚）」，又擅自丟棄她的物品，王婦更曾恐嚇，「公安都叫我做潑婦呀，邊個唔怕咗我呀？」當時凌母敢怒不敢言，現時回想不禁認為前新抱「係一個好狠毒嘅女人」。
對於虐兒事件，凌母心痛兒子惹上官非，形容事件是兒子將「遇溺」的王女「拉返上嚟（申請她來港），點知俾佢拖落海」。案件令兩母子十分困擾，近半年要食安眠藥才能入睡，兒子亦越見憔悴。
案件審訊期間，凌耀忠和王榮汶形同陌路人。凌每日散庭後，均會到法院外抽煙稍息，然後坐巴士返回青衣公屋。對於有否後悔，凌僅無奈稱：「早知有今日，就唔會咁啦，呢啲冇得講。」被問到會否擔心入獄，他答﹕「冇得擔心，係天意，我只係想盡快過，無論結果係點，只係想件事快啲過，我真係好攰。」對林林身世更不想提起半句，「真係唔想再諗起」。