呢個星期，人人講世界盃。平時唔賭波，並不熱衷睇電視直播足球嘅老友，居然都日日落注，話落注可以令到睇波更夠刺激喎！係就係嘅，不過要慎防血壓急升，好似賓架B咁，買西班牙勝葡萄牙，點知開波不久，C朗就博到12碼，領先一比零，心情為之一沉，跟住迪哥斯達扳平，然後西班牙鋼門迪基亞送大禮，接C朗射門，居然仿效利物浦守門員卡力斯，甩手送球入網，賓架B幾乎昏倒。後來見到西班牙連追兩球，反勝三比二，歡喜到跳起，但臨到完場前不久，C朗連中三元，憑碧基之愚蠢犯規，禁區外得罰球，一腳直入龍門左上角，絕世好波也，於是全場打和三比三，賓架B頹然跌落梳化，個心仲跳緊，然後收到財務C來電：「我買雙牙打和，有錢收，哈哈哈……C朗係足球上帝！」呢兩位老友事後都話好彩心臟仍然頂得順，世界盃令佢地着迷。
你估場場波都咁好睇咩，伊朗倖勝摩洛哥，場波都幾悶㗎，除非你係伊朗人。肥仔K留學日本時有幾位秘魯同學，睇到秘魯球員射12碼打飛機，射波上三樓，卒之輸畀丹麥零比一，在fb話想踢爆電視機咁滯。
香港球迷唔落注就冇乜激情嘅嘞，香港永遠冇機會踢世界盃（左丁山於1958年在戲院睇世界盃紀錄片之後，被17歲神奇小子比利奪去魂魄，日日踢波，發夢自己可以有朝一日踢世界盃。後來挑戰鄧鏡波中學，自己嗰隊輸咗唔知七比零還是八比零，即時夢醒了），香港永遠冇機會踢世界盃，中華人民共和國呢？仍然發緊夢。馬嶽教授（明報6月17日）寫「亞洲足球，信有明天？」我嘅現實答案係：「冇明天。」如馬嶽師弟所言，自2002年日韓聯合主辦世界盃之後，亞洲足球只有退步，不見進步，日韓能在歐洲球壇揚名嘅球員只有本田圭祐、香村真司、朴智星、孫興民，但都不是最頂級球星，只可以蝦吓中國隊，在世界上冇乜地位。中東亦唔見有球星，澳洲球員只配在英超踢中下游隊伍。點解亞洲出唔到C朗、美斯、阿古路、沙拿、尼馬、恩尼斯達呢？講體形身高，南美球星其實同亞洲人差唔多，山東大漢分分鐘大隻過佢地，足球不是籃球，靠身高手長，而係五呎六吋、五呎七吋球員就可以成為美斯、阿古路，大把廣東人係呢個高度，偏偏14億人中冇一個美斯出現！習近平話要對中國體制有信心，左丁山就對中國足球體制無信心嘞。冰島人口少過沙田，可以搵到11名球員對抗阿根廷，中國及亞洲人應該感到慚愧！中東有錢，日韓有規律，同樣在足球場上輸晒，唔通與文化有關？