巴西喺今屆世盃雷聲大強勢出擊，點知喺第一場分組賽就失分，禮拜日喺E組首戰被瑞士逼和1:1。尼馬喺呢場波表現一般之餘，仲不停被對手侵犯被踢到襪穿窿，似乎仲有受傷，喺禮拜二操練中途離場接受治療。受傷都未必係尼馬最唔開心嘅事，而係佢一心恤個靚髮迎接世盃，點知呢個意粉頭負評多過乜，連以出名玩低成本cosplay嘅網絡紅人都玩埋一份，擺堆意粉上頭就搞掂。
尼馬喺二月代表巴黎聖日耳門比賽嘅時間受傷蹠骨骨裂，唔遲唔早啱啱趕得切喺世盃開始前好番，喺決賽周前兩場熱身賽復出兼場場有波入，狀態似乎相當唔錯，難怪喺世盃揭幕戰之前，巴西被列為奪標大熱門。到咗禮拜日巴西首場分組賽，就慘被瑞士逼和1:1，尼馬喺呢場波簡直成為咗眾矢之的，不停俾瑞士嘅球員侵犯，全場被犯次數有成10次咁多，吹雞完場嘅時候，見尼馬一拐一拐咁離場，賽後亦喺佢嘅ig上載自己接受腳部按摩嘅相，似乎有啲傷。
訓練中途離場幸無礙
巴西喺禮拜二進行操練嘅時候，尼馬初時仍然可以同隊友有講有笑，互相傳球練習，不過唔夠幾分鐘，就見佢似乎覺得右腳有啲痛，冇耐更頂唔順要喺訓練中途離場，接受物理治療之後就直接離開訓練場地。
巴西足總隨後有證實相關消息，不過強調尼馬嘅傷勢冇大礙：「佢覺得有啲痛所以去接受治療，但好快就會恢復正常操練。」巴西第二輪分組賽會喺禮拜五對哥斯達黎加。
泰仔教set尼馬意粉頭
至於尼馬黃色似一堆麵條咁嘅新髮型，收到嘅負皮就相當多，有報章就笑佢個頭似鸚鵡。有位嚟自泰國嘅網絡紅人，開咗個「Low cost cosplay」facebook群組，玩嘅唔係盡善盡美嘅角色扮演，而係好搞笑咁用最平嘅架生去扮鬼扮馬，電影同動漫角色乜都有，吸引到唔少讚好。今次Low cost cosplay都食吓世盃條水，見尼馬造型咁突出都一齊玩吓。材料好簡單，意粉一包、黃色衫一件，喺浴室將堆意粉綁喺頭上，再開花灑淋熱水，好快就搞掂！