「你睇我唔到，你睇我唔到」，小記細過喺屋企做錯事，成日都會念呢句咒語，結果？當然係冇用，仲俾阿媽打到飛起！呢位巴士四眼男，似乎又係用呢條屎橋，諗住偷錢冇人知，最終梗係俾司機大佬發現啦！
由姓林新巴車長私伙車cam拍到嘅片段見到，四眼男入完錢之後，唔單只冇行入車廂，隻手仲喺錢箱口撩吓撩吓，幾秒之後仲喺錢箱度拉咗張廿蚊紙出黎，成個過程只有幾秒，而呢位哥仔都交足戲，彎晒身咁，唔知嘅仲以為入錢好辛苦！不過佢動作咁大，車長點會睇唔到，見住呢位哥仔偷咗錢，仲想行入車廂，就即時喝停佢。
車長大佬話，事發喺6月18日（周一）下晝3點幾，四眼男喺柴灣道富城閣巴士站搭新巴8P線，去灣仔方向，車費$6.1，喺前一個站，有位後生仔因為八達通冇錢又冇散銀而入咗張廿蚊紙落去，可能車長戥個後生仔肉赤，所以好記得，但點知張銀紙卡住咗，冇跌落錢箱底，車長唔敢掂個錢箱，驚引起誤會，由得張銀紙喺度，諗住一陣有人入散紙嘅話，張銀紙自然會跌落去，點知咁都會俾人打主意。
遭司機喝止
見到四眼男出力咁撩，車長初頭仲以為佢咁好心，幫手篤張廿蚊落去，所以初時冇出聲，但見到佢越篤越過癮，仲一手攞咗張廿蚊出嚟，就即刻喝住佢，四眼男仲狡辯話張廿蚊係佢嘅，車長最終冇報警，「見佢畀番張廿蚊出嚟就唔追究，驚報警會阻住成車乘客，但𠵱家啲人可以咁樣，真係好離譜」。
新巴回應話已經接獲車長嘅匯報，公司有規定，如果車長發現乘客偷錢，必須通知車務控制中心，聽從指示處理。