【記者梁智威俄羅斯直擊】喺莫斯科，真係搵唔到7-11。可能係小記眼殘，又或者，莫斯科本身已經好便利，唔需要便利店。
小記隨nowTV世界盃採訪團嚟到莫斯科，住喺距離市中心西南面約20公里嘅地區。不得不讚nowTV同公關團隊嘅選址，靜中帶旺，交通便利。但，就係冇7仔。小記想買啲日用品，好似有助寫稿靈感之類嘅酒精，就算我可以喺附近超市買到手，但心裏總係唔踏實。於是，小記踏上尋找莫斯科7仔之旅，坐上metro，一站又一站。嚟到紅場嘅革命廣場站，終於搵到我嘅7-11——係7號白必圖同11號羅馬里奧。呢件波衫呢對組合，當真說來話長，94年世界盃，巴西7-11組合所向披靡，搞到巴治奧抱憾，同時又讓白必圖嗰吓抱B慶祝動作令人永世難忘。
望住呢對既熟悉又陌生嘅7-11組合，望住呢雙背影，又望望近屆世界盃，如今球星安在？或許人到中年，總係鍾意回首往事，數昔日球星如數家珍，談論今日新星一臉茫然。唔使搵藉口，人就係喜歡懷舊，星味亦需時日醞釀，要不然，剛退役不久嘅派路、剛退出國家隊不久嘅保方，都唔會馬上就被球迷懷念——並非後繼無人，而係風姿綽約早成佳釀。
唔知道由何年起，又唔知係咪因西班牙而起，4-4-2呢種傳統陣式已漸漸消失，部份球隊學人打單箭頭，或者偽三箭頭。一個前鋒，又何來組合？更甚者，如今唔止冇7-11，甚至連傳統9號位前鋒都逐漸減少，彷彿所有9號位都變成9號半，一人分飾兩角，一個人就係7-11。走在莫斯科街頭，我搵唔到7-11，希望睇完今屆世界盃之前，喺足球場上，會重新出現讓人細味懷念嘅7-11。