首次殺入世盃決賽周嘅新丁巴拿馬，周一晚終於喺G組出場，雖然最後就以0:3輸畀比利時，但成場比賽表現唔曳，仲幾乎有破蛋機會。我求大俠之前對巴拿馬呢個中美洲國家嘅印象，就可能好似大部份香港人一樣，好無知咁只係喺電影《賭神》入面聽過陳金城話同巴拿馬總統有啲交情，但經過呢場波同埋啲網友係咁出相，先知原來隊波咁有明星相。
首先門將賓尼度一面鬍鬚，加埋個八二分界，真係同意大利門將保方有幾分相似，仲要大家都打龍，幾可以假亂真，甚至連講波嘅評述員喺近鏡影到佢時，都話佢係滄桑版保方。
隊長似足卡林保
至於中場基比爾高美斯，有網友搵到一張佢受傷倒地嘅相，無論髮型、五官、鬍鬚、神情都同NBA球星、塞爾特人控衞K艾榮（Kyrie Irving）十足十咁似，原來「Uncle Drew」唔止會走出街場撩人鬥波，仲去埋踢世界盃，百足咁多爪，真係點夠你玩呀！
另外，教練靴蘭高美斯就身形同外表，都有啲同香港武打巨星洪金寶相似，但個髮型就儍仔少少；不過，其實高美斯喺1998同2002世盃，都先後帶過哥倫比亞同厄瓜多爾打入世盃決賽周，但大家就冇發現過佢似洪金寶，我就覺得大家都係講開巴拿馬有明星相，先至夾硬搵個明星將佢計埋入去啦。
其實仲有個踢得好搶眼嘅大隻中堅隊長路文托利斯，有人話似法國名宿卡林保，我亦覺得可能係因為佢夠橫加埋個髮型，先至有呢個感覺，但佢最令人留下深刻印象，就係全場負責睇實盧卡古，同呢位曼聯中鋒鬥力嗰幾幕，但最後都功虧一簣，俾對方喺69同75分鐘梅開二度。
不過，如果要講到比利時呢場最靚入球，當然係梅頓斯下半場一開波嗰球先開紀錄嘅「窩利」世界波，而且如果唔係呢球，上半場發揮咁唔理想嘅比利時，之後點會贏得咁順利呢？
Now TV每日只需$6*，
全年睇盡猛片，新劇，世界盃
即刻撳下面登記優惠或致電2888 1888(後按2)申請啦！
https://bit.ly/2JqDJKw
*優惠期有限，受條款及條件約束。