上環嘅真人春宮片吸引街坊駐足觀看，唔少人拎埋手機拍片，實行「有影錯、冇放過」。不過稍一不慎，隨時墮入法網。大律師陸偉雄表示，市民如果只係拍低魚水之歡嘅過程，未必觸犯法例，因為市民可以辯解影片用作證據或報警用途。
公眾可見猥褻暴露屬犯罪
陸偉雄提醒如果市民發佈影片，有機會觸犯《淫褻及不雅物品管制條例》。根據條文，若果影片被審定為「淫褻」，不論發佈者知唔知該物屬淫褻，均屬犯罪，最高可罰款100萬同監禁3年；若評定為「不雅」，亦不可以向18歲以下人士發佈。
至於事件發生喺私人地方，兩位主角係咪完全免責？陸偉雄話由於事發單位喺公眾可見地方，但窗戶完全冇落窗簾仲開埋燈，因此有理由相信兩位主角預計到有人見到，呢個情況下有機會觸犯《刑事罪行條例》第200章第148條「公眾地方的猥褻行為」，任何人無合法權限或辯解，在公眾地方或公眾可見的情況下，猥褻暴露其身體任何部份即屬犯罪，定罪可處罰款$1,000及監禁6個月。