立法會食物安全及環境衞生事務委員會本來喺暑假搞巴西睇肉團，睇吓當地肉類檢疫同進出口情況，但因為陸續有團友退出，最終決定取消。
張宇人怕打針縮沙
近日表明唔去嘅係公民黨飛機師譚文豪。查實佢原本都話明，行程必須真正睇到農場嘅運輸鏈，如上船或飛機前點處理凍肉、點確保啲肉唔受污染等，但最終行程安排唔到，「既然行程冇料到，冇乜意義，我哋用公帑考察，所以唔去。」據知另一原本報名隨團嘅非委員會委員何君堯亦退出，連同考察團倡議者張宇人因怕打針而縮沙以及其他人相繼甩底，泡湯收場。
其實取消睇肉團都係幫納稅人慳錢。按早前立法會文件披露，委員會秘書初部估計坐商務客位嘅議員訪問開支達79,369元，搭經濟客位則每位開支盛惠為37,621元，開支包括來回機票、酒店住宿、膳食、市內交通、旅遊保險及接種疫苗等費用。而每位議員四年任期各有5.5萬公帑用作海外職務訪問，如議員今次報名參加兼坐商務，至少用晒嗰5.5萬，超支就自己補貼。