鄉議局委員廖書蘭今午喺鄉議局副主席林偉強陪同下與記者茶敍，介紹佢本新書《被忽略的主角——新界鄉議局發展及其中華民族文化傳承》，由於本書講及唔少鄉議局歷史，林偉強話應該送本畀特首及一眾高官，令佢哋解決新界問題時，有更多相關知識。
鄉事派出書爆料
廖書蘭仲預告，希望明年底再出版一本名為《劉皇發的故事》新書，透露書中訪問咗唔少發叔身邊人，包括發叔親人、同村兄弟以及幫發叔揸咗40年車嘅司機等，當中有唔少趣事，包括發叔細個原來養過一隻了哥，每當發叔返屋企時隻了哥就會叫「發哥返嚟」，𠱁得發叔相當開心。發叔司機仲有段難忘經歷，就係當年「魔警」徐步高被警方擊斃後，警方曾要求見發叔同佢個司機，原因係警方發現徐步高紀錄咗發叔車輛出入地方同車輛顏色，相信徐嘅下一個目標可能係發叔喎！