冰島喺上禮拜六世盃D組逼和阿根廷1:1後，再一次成為球迷熱話，呢個人口得30幾萬嘅小國可以企得喺世盃舞台仲咁受注目，當然係因為喺場內場外熱血到爆，而冰島歷來最出名嘅球星古莊臣，原來佢由老竇嗰代開始已經貢獻緊冰島足球，𠵱家佢三個仔都子承父業，隨時踢足三代呀！
球壇上子承父業嘅故事唔少，但古莊臣父子都算經典，1996年冰島對愛沙尼亞嘅友賽，當時34歲嘅阿諾古莊臣俾17歲嘅古莊臣入替，成就後者嘅國家隊地標戰，真係世代交替。𠵱家已經57歲嘅阿諾古莊臣係以前冰島足壇最出色嘅球員，佢踢過安德列治同波爾多，18年國家隊生涯攞到73頂喼帽同入14球。
望子成龍繼父業
而超越佢嘅就係古莊臣，曾效力車路士、巴塞隆拿等大會，贏過兩屆英超，亦係巴塞09年六冠王功臣，曾經踢過88場國際賽錄得26記「士哥」，幫國家隊由魚腩變成歐國盃八強分子，直情係冰島足球嘅代表人物。𠵱家39歲嘅古莊臣三個仔都做緊球員，20歲嘅大仔艾朗踢緊冰島頂級聯賽嘅Breidablik，二仔盧卡斯就係愛斯賓奴青年軍成員，16歲嘅佢同老竇一樣打前鋒，論上位機會佢最高。而12歲嘅細仔崔斯坦就參與緊巴塞青訓營，表現都幾好。
感受到國民支持
古莊臣都認自己對囝囝期望好高：「做老竇梗係望子成龍，想佢哋職業生涯中的成就遠超於我。不過每次睇到佢哋飛身鏟波，本能反應都係『噢，唔好受傷。』不過，當佢哋入到波、踢得好或者有盃捧時，我都特別驕傲。」古莊臣亦都好重視青訓教育：「西班牙嘅足球教育非常出色，踢大、小球會都冇問題，所有教練都好好。盧卡斯曾經為冰島U17同U18出賽，佢已經感受到完全唔同風格嘅足球，如果佢將兩種風格融合到，就會全面好多。」
冰島一班球員都係「以父之名」落場，古莊臣坦言希望囝囝做到大國腳：「如果佢哋想踢波嘅話，又夠能力令我哋喺球場傳承家族嘅名字，梗係一件奇妙嘅事。」
冰島雖然紅透半邊天，不過中場賀杜亞麥拿臣就話最緊要都係國民嘅支持：「場內雖得4,000個冰島球迷，但我知喺國內每個人都努力幫我哋唱歌打氣，我哋感受到，真係感受到！」