迫使巿民掛上晴天娃娃替大樹發聲「救救我吧」嘅緣由，就係一條造價17.85億、連接西鐵朗屏站至教育路的有蓋行人天橋（圖），上月底立法會工務小組投票通過議案，即將會交到立法會財委會審議。
平均每米造價316萬
話說呢條天橋係10年前曾蔭權年代提出，當時建議天橋嘅終點係教育路再遠200米嘅馬田路，而估價只不過係2億，區議會同各黨派都支持，但就為天橋嘅落腳點同設計有爭論。點知到今年報價「通脹」至17億，天橋全長只係短短540米，平均每米造價高達316萬，唔嘩聲四起就假！
最近有市民留意到可能有37棵樹將受工程影響要被移除，天價工程加上要斬樹起橋，令爭議升溫。喺元朗長大嘅元朗區區議員鄺俊宇都話，嗰度啲樹陪咗元朗居民好耐，政府要確實講出究竟有幾多棵樹、同埋乜嘢品種嘅樹會受影響。佢都覺得17億太貴，所以佢喺工務小組投咗反對票，「區內居民都覺得條天橋太貴，同埋呢條天橋係唔係可以解決到元朗大馬路嘅擠塞呢？又未必喎。今次天價天橋有冇顧及過居民嘅感受呢？」