噚日父親節，勞工及福利局長羅致光又乘機借佢篇網誌，推銷政府提出將男士侍產假由3日增加至5日，事關有立法會議員唔肯收貨，認為起碼要加到7日。羅致光話呢個共識係勞顧會得來不易，叫議員要支持。而佢為咗加強說服力，仲不惜以今日的我打倒昨日的我，批自己當年做議員嘅時候，提出要有兩星期男士侍產假，太過「超時空」、太過飛擒大咬！
話要珍惜 冀盡快通過
羅致光喺網誌話，政府自2016年對法定侍產假進行研究之後，搞咗好多次聚焦小組討論同3次問卷調查，最後先喺勞顧會度達成男士侍產假增加至5天嘅共識，叫大家要珍惜𠵱個得來不易共識，盡快喺立法會度通過。
佢為咗加強叫議員接受共識嘅說服力，不惜喺網誌度自爆，喺2001年佢自己仲喺立法會做緊社會福利界議員嘅時候，曾經整咗一份名義上叫「家庭政策」嘅諮詢文件，入面提及男士侍產假應該有兩個星期，但因為叫價太高，當時社會根本冇認真討論過，佢又話自己當年開價之高，環顧今日各界嘅叫價，都可謂「超時空」咁高！
其實男士侍產假兩星期，係咪叫價太高呢？其實外國亦有相近嘅男士侍產假，不過今時不同往日，以前羅致光係議員，𠵱家係局長，屁股指揮腦袋，睇嘢自然唔同咗！
李八方