繼上年父親節大整蠱fb帖「到麥當勞講『我係你老竇』即獲免費餐乙份」玩盡全港父親後，近日又再出現類近帖子，網上有圖片標榜「父親節特別優惠」，聲稱18歲以上男士到任何便利店向店員講：「我唔想做老竇！」即免費獲「贈」安全套一份，如果不知就裏去便利店講咗，真係好瘀。
呢個帖一出，立即引起各界熱議，有網民就話繼麥記我係你老竇後又一新猷，直言大家唔怕死的話，可以去麥當勞或七仔試吓，亦有網民笑稱如果大膽啲講「我Ｘ你老竇」，應該連禮品附送免費拳頭一個，認真啜核。
不過，如果大家細心啲睇，背景圖其實係一幅仿照7-11的山寨便利店，該堆文字結尾還有一個括號，內有細字寫明「盒套自費」，擺明就一個娛人娛己的post。查實呢個廣告係由「關懷愛滋」健康服務中心轄下一個名為「有種部隊」的健康團隊喺fb專頁推出嘅「二次創作」，主要提醒男士唔想做老竇，應該正確使用安全套，亦可預防性病及愛滋，設計手法參考上年麥記假post「我係你老竇」，想法認真別出心裁。