蔣怡（Coco）嫁珠寶設計師翁狄森（Dickson）後，同年即生下女兒翁容，女兒現今已4歲大，兩公婆終於追仔成功，不過蔣怡陀B時患上妊娠糖尿，搞到心情抑鬱。B仔上月底已提早出世，但生產過程驚險，Coco半夜穿羊水宮縮嚴重，驚險送院開刀，比預產期早了兩星期出世，囝囝重5.3磅，現已回家休息，趕及一家四口過父親節，而上月Coco更找來大蛇、蜘蛛纏身影近乎全裸的大肚寫真作留念。
現年41歲的女模蔣怡，於13年嫁予珠寶設計師翁狄森，二人育有4歲囡囡翁容，數月前宣佈有喜再陀第二胎，已知腹中是男B，湊成一個「好」字，Coco原本打算本月中入院剖腹，上月出席活動時，自爆有妊娠糖尿要戒口，令她心情有點抑鬱。
午夜突穿羊水
原來，留在香港專心養胎的Coco上月30日突然作動，秘密入院提早開刀，B仔提早出世，重2.4公斤（即約5.3磅），母子已出院回家休息，趕及一家四口過父親節。Coco回憶當時情況，當晚與丈夫外出與圈中朋友晚飯，席上有友人講笑指BB會「今晚」出世。Coco回到家中後，竟一直睡不着，忽然感到下身有水份滲出，即拍醒熟睡中的Dickson，兩公婆即坐車去醫院，臨出門前還親吻熟睡的囡囡。往醫院途中，Coco流出的水量漸多，抵達醫院時，已經穿了羊水，幸好Dickson帶了大毛巾包住她下身，而她就開始宮縮，令她感覺強烈的痛楚，更處於全身顫抖的狀態，她一邊生仔、一邊擔心BB早產，幸好最終母子平安，現在Coco在家坐月，慢慢調理身體。
生仔有驚無險，原來Coco跟生上一胎一樣，上月已影了一輯近乎全裸的大肚寫真留紀念，一向愛動物的她更以動物做主題，找來蜥蜴、蜘蛛、蛇及龜等動物合照。整輯相意識相當大膽，當中有蜘蛛爬身，又讓巨蛇纏着身體遮蓋胸及下身敏感位置，又伏低學蜥蜴爬行，展現野性美感，Coco表示：「上次拍攝好簡單、黑白全裸寫真，今次我想挑戰自己，大肚寫真主要紀錄懷孕時曲線美態同身體變化，我同Dickson一直好喜歡原始同大自然感覺，所以同攝影師溝通過，選擇走出戶外，向海灘同樹林進發，加上認識咗爬蟲類專家，就邀請佢提供唔同種類動物，令拍攝效果更加美滿！」
老公全程陪伴
拍攝構圖大膽，Coco表示拍攝當日是5月中酷熱的一天，幸好老公全程陪伴：「自己都覺得好大膽有呢個走出大自然概念，仲要擔心各方面配合，好似海灘環境、泳客、各種動物同自己身體狀況等。」問到與各種動物合作拍攝，她表示：「一向都好喜歡各式各樣動物，無論貓、狗，蛇、蜘蛛同蜥蜴等，而且懷孕體態、精采動物都係美麗標誌，都係大自然一部份，希望透過相片能傳遞畀大家更珍惜大自然資產、懂得重視每個生命等訊息。」
撰文：唐如
