噚日係父親節，唔少人已提早過節，但有網民投訴，指大埔街市3樓熟食中心有檔口涉嫌偷龍轉鳳，不但將佢提供嘅虎蝦調包成普通海蝦，更辯稱「蝦蒸過會縮水」，當事人話對方「當啲客係白癡」。個帖不足半日已吸引逾4,800網民回應、逾千人畀嬲嬲同嘩，怒轟該店無良。惟該店負責人否認指控，並稱已報警備案。
網民Lok Chan喺facebook群組圖文並茂話外出過節用膳，「買二百幾蚊斤虎蝦畀佢（該店）蒸」，但「成個鐘都未有得食，之後拎咗碟蝦畀我哋，睇見即時起火……佢竟然求其拎碟普通海蝦畀我，仲同我講蝦蒸過會縮水」，事主話表明要報海關，老闆娘即時「笠水」。
但有自稱係該店其中一名負責人發帖澄清，反斥食客用「1隻虎蝦，屈人成碟」，又話「客人主動話要求賠$390了事，因為唔想阻住做生意，所以賠咗畀佢」。
店主：零零舍舍有隻虎蝦
涉事食店負責人之一陳小姐接受《蘋果》訪問時話，當晚職員接到份蝦時，已發現係一堆海蝦同一隻約6両重虎蝦。一般來講若發現「零零舍舍有隻唔同品種嘅蝦」都會先知會顧客，但可能當晚比較忙，冇告知顧客。事後佢向街市內一間海鮮檔查詢，稱確認該顧客買咗一斤幾海蝦，以及「搭埋買檔口最後一隻虎蝦」，又聲稱獲海鮮檔答應翻查閉路電視，唔排除將片段公開，昨已向警方備案，希望還她一個公道。