爆相爆片:政府起橋要斬樹 晴天娃娃集氣伸冤

爆相爆片:
政府起橋要斬樹 
晴天娃娃集氣伸冤

近排天氣陰晴不定,有人喺元朗大坑渠旁邊鐘聲徑嘅其中一棵大樹上面掛起多個晴天娃娃,最大嗰個有成兩個西瓜咁大。但佢哋全部都附有標語,「請救救我吧」、「替你遮蔭不要斬我」、「幫你降溫不要斬我」,似乎唔係祈求晴天咁簡單,究竟有乜冤情呢?
《蘋果》記者日前到現場視察,發現沿路綠葉成蔭嘅鐘聲徑,只有元朗真光小學對開一棵大概5米高嘅串錢柳,被人掛上25個以綠色毛巾製成、大小不一嘅晴天娃娃,仲有其他訴求:「我祈求奇蹟出現留住通風廊」、「祈求十七億能活化舊區」,睇晒啲標語之後終於有啲頭緒。
原來事件同近日爭議聲不絕、造價17億連接西鐵朗屏站至教育路嘅行人天橋有關,事關工程或者要斬樹建橋。
住喺鐘聲徑附近差唔多廿年嘅Leo話,上個禮拜四夜晚返屋企時見到有7、8個人喺樹上掛晴天娃娃,但當時冇留意佢哋身份。Leo形容棵樹對元朗居民幾重要,因為係平時居民嘅聚腳地,所以希望大樹得以保留。佢覺得無論基於乜嘢原因都唔一定要斬佢,事關要重新種一棵咁大嘅樹唔係一時三刻做到。

元朗鐘聲徑一棵大樹上面掛起多個晴天娃娃,最大嗰個有成兩個西瓜咁大。

婆婆:政府做嘢到我反對咩?

至於平時喺大樹下唞涼嘅街坊區婆婆口口聲聲話唔在乎,但聽落好似有骨落地:「政府做嘢到我反對咩?」咁天橋對街坊係唔係有用?區婆婆態度照舊:「行得到咪好,行唔到你起10條(天橋)都冇用㗎!」
搬入元朗住咗6年嘅羅先生就覺得市中心的確太多行人,所以係有需要興建天橋疏導人流,不過棵樹有保育同美化環境嘅作用,斬咗佢相當可惜。佢希望起天橋嘅同時,又可避免斬樹,兩全其美就最好嘞!