今日父親節，冇馬跑，有少少奇怪，因為每年嘅母親節，馬會例必避開，改在星期六跑馬，但父親節星期日就從來馬照跑嘅，今年大概係要顧及男女平等，故此提前一日（昨日）跑馬，等父親可以留在家中，不去馬場了。
左丁山咁講法，好似所有父親都去馬場咁。其實係啲老父親多數去馬場，新父親（四十五歲以下）對賽馬未必有強烈興趣，馬迷普遍年紀老化，係不爭事實，如肥仔K者，做咗父親亦必到馬場，乃少數人。
父親節不離一家大細，齊齊到酒家吃晚飯。每逢母親節，中式酒樓生意大旺，一晚做兩輪，父親節就只有一輪生意，為何如此，左丁山唔知。叙福集團主席兼行政總裁黃傑龍對左丁山講：「香港人逐漸喜歡吃非粵菜，青年人最鍾意日本菜及輕便地中海菜式，但一到咗母親節、父親節，冇得講，人人都湧去中式酒樓，此乃香港特色，大概粵菜係適合好多人一齊食嘅，兩三個人出街就食日本料理咯！」黃傑龍睇得咁通，唔怪得叙福樓雖是中菜品牌，實際上非中菜收入已佔大份，譬如佢地旗下嘅「牛角」，左丁山未去過，但據一啲年輕朋友講，各區「牛角」分店，每間都要排長龍，幾難先至入到去有位也。
至於要客人幾千幾千以至萬萬聲找數嘅（未計紅酒）就一定係中菜啦，福臨門、七福、國福、鏞記、名人坊等全部有此資格。月初在名人坊吃午飯，成班人（十人）食富哥（鄭錦富）嘅拿手好戲，秘製琵琶豆腐、涼瓜炒肚尖、蛋白蒸蟹鉗、炸子雞，大家吃到舌尖搖動，大讚一流，呢啲菜式，看似簡單，但要蒸炒炸到剛剛熟，不過火，入口有味道而不鹹，合乎現代健康食物要義，咁就好難咯，要富哥出手先至掂，飯後地產F問富哥：「有冇黃花魚，幾錢條？」富哥答：「一早預約就可以搵到嘅，一條怕要過萬銀！」大家為之嘩一聲，地產F話：「萬幾銀食一條魚，我食得起但唔食咯，我點解咁問呢？前星期有朋友請去灣仔一間新X記食飯，我多口係咁意問一問，黃魚有冇，經理答：一萬至三萬都有，來自東海，真係嚇咗一跳，一條魚係人地一個月人工呀！」後來見到一位中資機構老總，問佢有冇去過新X記，佢答得妙：「主席受客人邀請去過一次，返嚟後，開會時特別向我地班高管勸喻不宜出入新X記，以免被人影到相作為口實！」但據講新X記每晚門前名車多到數唔晒喎，此則作何解釋？