爆相爆片：
自閉少年跪低求饒　
巴膠騎住打　事主家人網上控訴

最近網上瘋傳幾張相，就係兩位巴士迷喺沙田馬場外打架，其中白衫男仲成個人騎喺紅衫少年上面，仲狼死到捉住少年個頭係咁撼落地，外人睇到都覺得心寒，更何況係受害者嘅屋企人呢？紅衫少年家姐睇到非常心痛，仲喺網上討論區大控訴。

長期遭欺凌

少年家姐喺帖文話，14歲嘅細佬患有自閉症，因為佢係巴士迷，好鍾意坐巴士同影巴士，更加對所有巴士線同車站資料都瞭如指掌，屋企都好放心畀佢自己出去，點知原來細佬過去兩年一直都俾人蝦，屋企人喺網上見到呢張相先發現，媽媽仲傷心到喊唔停。
話說呢件事發生喺6月3號，當日細佬同一班巴士迷喺沙田馬場外嘅巴士站影相，唔知因為乜事嘈起上嚟，白衫男就騎咗上佢細佬身上，狠狠地將佢個頭撼向地面，圍觀嘅人唔單止冇阻止，只係掛住影相拍片放上網，仲有人係咁笑。據少年家姐理解，原來白衫男喺4月時，曾經掌摑過細佬，家姐再進一步了解，先揭發細佬喺過去兩年成日俾人蝦，搞到周身痛，但都唔敢同屋企人講，媽媽只係以為個仔撞親，幫佢捽藥酒。
小記八到，紅衫少年同白衫男都係一個網上巴士群組成員，白衫男更係活躍分子，自從俾人打完之後，紅衫少年已經驚咗佢，當日重遇，紅衫男仲驚到向佢下跪，但白衫男唔單只冇放過佢，仲變本加厲，認真過份！
警方回覆話，案件已列作「襲擊致造成實際身體傷害」，經過深入調查後，星期一喺機場拉咗嗰個姓羅（24歲）嘅男子，已獲准保釋候查，須於7月上旬向警方報到。