特區政府會同貿發局喺6月28日喺會展舉行「一帶一路高峰論壇」，為咗令在場人士透過視覺同味覺感受「一帶一路」各地文化，據知屆時場館一角會佈置成懷舊嘅「香港茶餐廳」，向與會人士提供港式奶茶試飲，而啲奶茶係由「金茶王」陳子平即場沖製嘅，同場亦有菠蘿包、缽仔糕、龍鬚糖等港式美食試食，「全球投資機遇專區」更會提供各地特色美點，等與會者喺茶歇期間品嚐。
而喺去年10月成立，由各地對「一帶一路」有興趣商會、研究機構同智庫等單位組成嘅「一帶一路國際聯盟」，則會喺6月27日即係「一帶一路高峰論壇」前夕，喺會展舉行首屆年度圓桌會議。屆時嚟自世界各地嘅聯盟成員代表會聚首一堂，交換對「一帶一路」最新發展嘅意見，探討點樣進一步推動倡議。