區議會選舉仲有一年就舉行，非建制派早前內部協調希望唔好「撞區」，以免建制派漁人得利。但要協調，談何容易？八方聽聞唔少區撞到七彩，好似灣仔維園選區，除咗社民連，本身係灣仔區議員楊雪盈助理、最近因為佔領語文中心而成名嘅浸大中醫系學生陳樂行，以及社區組織維多利亞社區協會李永財都有意參選，隨時三個非建制戰一個建制！
非建制派都深明，若然撞區只會分薄票源，等同將議席拱手相讓，所以上個月維多利亞社區協會同楊雪盈、陳樂行等人，喺港大法律系副教授戴耀廷協調下出席飯局，據知席間戴教授提出以初選解決，但未有共識。三方則各有話兒，據知社民連就話一早向民主動力報名，李永財則稱過去一年都有積極落區，陳樂行則相信係想同楊雪盈孖住出選。
三角大混戰可以點解？有民主派認為就一個小選區初選耗費太多，並唔值得，最好其中一方可以退讓，而灣仔仲有好多選區未有非建制落腳，建議未做地區工作嘅人不妨考慮。