矚目新股小米終於定喺下星期六（23號）搞IPO記者會喇，呢隻霸佔各大傳媒多日版位嘅新股，自然唔使叫，大家都會去㗎喇，奇就奇在，記者會邀請函竟然有dress code，叫大家唔好着短褲拖鞋！
公關姐姐就話，唔畀着短褲拖鞋並非佢哋原先安排，而係場地四季酒店嘅要求，去開會唔可以着短褲拖鞋咁話。不過呢，華華出入四季去咁多次記者會，都未曾留意到有咁嘅要求。
有dress code都唔止，邀請函仲要求大家要先做網上登記，記者會當日又要早半粒鐘到達，夠晒巴閉，可能怕到時又有大批米粉到場要一睹「雷布斯」光采，秩序混亂啩。