呢日中午吃飯之時，博士C考左丁山一條問題，「庚子賠款時，中國要賠八國聯軍幾多銀両？」好彩仲記得中學讀過嘅歷史，即刻答：「白銀四萬五千両！」博士C又問：「咁美國佔咗幾多？」吓？考起，問番博士C：「點解突然間講起八國聯軍，庚子賠款，你有乜原因？」博士C笑曰：「近日睇中興賠款十億美元畀美國嘅新聞，在微信上有內地網民突然將中興賠款與庚子賠款比較，話係喪權辱國之舉，2018年與1901年並無不同，言談相當大膽，香港人睇中興新聞唔會聯想到呢個角度嘅，故此問吓你。」原來如此，好彩手機上網好易，立即搜尋歷史資料，當年賠款總數四萬萬五千萬両白銀（未計分期償還之利息），據說等於3億3千萬美元。一両等於1.32275安士，四萬五千両即是595,237,500安士，以近日市場價格每安士18.86美元計，即等於今天一百一十二億二千六百餘萬美元，係1901年價值嘅33.9倍，伸算之下，當年呢筆賠款十分高昂。
八國之中，今日之習近平好朋友嘅俄羅斯佔最大份，有28.97%，美帝呢，只有7.32%，計1901銀價，佔二千四百幾萬美元，乘番33.9倍，約等於2018年之八億二千萬美元左右。內地網民話中興賠款十億美元，係一個乜嘢概念，依家睇到嘞！與庚子賠款嗰份差不多，中興賠款從此可寫入史冊，與庚子賠款並論。
同博士C笑完，博士C話：「不可不知，美帝當年還有良心，好快就退回庚子賠款，作大清帝國畀學生作公費留學美國之用，後來用賠款成立清華預備學校，民國時轉為清華大學，呢間中國一流大學，係美帝播下種子嘅，對中國都幾好。故此庚子賠款看似喪權辱國，到底還有正能量一面，今日之中興賠款，睇怕特朗普冇咁好死，會退還款項噃！」呢啲嘢，喺香港講好嘞，在內地講起，必然傷害人民感情，習近平主席豈是光緒慈禧可比！呢個時候，公子L插句嘴：「咁啦，算係勾踐忍辱負重，忍一時之氣，唾面自乾，必將夫差趕絕！」博士C再推算下去：「唔，香港呢個時候可以發揮特殊作用，北京自有芯片傷心之事後，發覺香港有好處，譬如可以輸入西方高科技產品，而大陸不能，故此立即批示資金可以過河，將來大力支持香港科研，以後大家各位子弟入讀大學揀科，要考慮新形勢呀！」