有自閉症男童被打嘅相片喺網上瘋傳，家人先揭發，原來佢過去兩年一直被欺凌，都唔敢同人講。協康會教育心理學家黃俊傑話，自閉症嘅小朋友，應變能力比較低，亦都唔係太識分辨欺凌同開玩笑嘅分別，「好多時會以為人哋同佢玩」，就算佢哋知道自己俾人蝦，自閉症小朋友亦未必知道點做，或者向乜人求助。
照顧者宜留意異常行為
黃俊傑提醒自閉症小朋友嘅照顧者，應該同佢哋嘅學校多溝通，了解佢哋喺學校認識乜嘢人，有冇行為異常，因為當佢哋身上出現傷痕，已經係嚴重情況，問題可能已經持續咗一排。對於被欺負嘅巴士迷，曾經向欺凌者下跪，黃俊傑話，因為自閉症小朋友被欺凌後產生嘅不安同恐懼，唔識排解同表達，可能就用咗最直接嘅方法，下跪求饒，希望對方唔好打自己。
黃俊傑補充，自閉症小朋友經常會非常專注於自己鍾意嘅事物，例如：巴士、飛機等，有時甚至忽略外界，連身邊嘅人同佢講嘢都唔為意，可能會因為咁令人覺得佢冇禮貌，由於自閉症小朋友唔識睇人眉頭眼額，黃俊傑建議，照顧者要多提醒及協助，改善佢哋嘅社交能力。