前晚9點幾，九巴有位車長，因為唔滿意有乘客開住部收音機嘈住佢揸車，結果佢將架巴士泊埋站之後唔肯開車，仲話自己唔怕炒魷魚。事件擾攘10分鐘，經過乘客多次要求，呢位車長先肯開番車。
「再嘈吖，我再停低呀」
究竟件事邊個着邊個唔着？真係好難講，因為《公共巴士服務規例》列明，乘客故意阻礙司機或分散司機注意力，可罰款3千同監禁6個月。九巴《乘客須知》亦列明車長有權拒絕引致騷擾嘅乘客搭車。
事發時呢位姓陳車長，揸住部42M九巴由荃灣去緊青衣長亨邨。李小姐坐喺上層，聽到車長喺樓下嗌：「熄咗部收音機佢！」之後部巴士去到曉峰園站，車長就泊埋站5分鐘都唔肯開車。有乘客就影低車長，車長竟然叫乘客：「影清楚啲呀！」有男乘客對車長講：「你分分鐘俾人炒魷魚㗎。」但車長大大聲反駁：「我唔會㗎，你嘈住吖嘛，你嘈住司機揸車吖嘛！」
呢位車長其後開番車，但另一名女乘客再話車長：「個個趕住返屋企食飯」，車長就還擊：「再嘈吖，我再停低呀！」點都好啦，九巴職員權益工會理事長李國華就希望，車長同乘客以和為貴。