2018年俄羅斯世界盃已經開鑼，「紅魔鬼」曼聯領隊摩連奴賽前都有預測出線形勢，力撐由基斯坦奴朗拿度（C朗）領軍嘅家鄉球隊葡萄牙可以殺入決賽，同以美斯為首嘅阿根廷爭冠。不過講到邊隊可以捧走大力神盃時，摩佬就即時戴晒頭盔喇。
想英軍快啲放暑假
摩佬由世界盃分組賽開始，預測邊16支球隊可以脫穎而出，殺入淘汰賽階段。佢話身處G組嘅英格蘭有能力喺今屆賽事造出好成績，雖然英格蘭球員年紀輕輕，但大賽經驗豐富：「佢哋喺全球競爭最激烈嘅英超比賽，而且都有喺歐聯比賽嘅經驗，呢啲顯然係好高水平嘅比賽。所以我相信佢哋可以做出好成績。」
「三獅軍團」嘅粉絲唔好咁開心住，因為摩佬隨即進入「頭盔mode」，指英軍喺八強遇到巴西就會行人止步。英格蘭陣中有菲爾鍾斯、連格、艾舒利楊格同拉舒福特等「紅魔鬼」球員，佢仲講笑咁話：「我班球員可以提早放暑假，未嘗唔係好事。」摩佬仲話：「德國、法國、西班牙同埋巴西都係強陣出擊，但陣容好唔等於球隊好，有時陣容唔算好嘅球隊都可以係好球隊。不過，我又唔認為黑馬球隊可以喺今屆世盃有幾大嘅驚喜。講到尾，南美同歐洲前列球隊，會係爭奪今屆世盃冠軍嘅熱門之選。」
雖然摩佬預計葡萄牙喺B組只可以次名出線，但佢就相信家鄉球隊可以喺淘汰賽過五關斬六將，一路殺入四強。而摩佬嘅最後四強心水分別係葡萄牙、巴西、阿根廷同德國，佢就覺得葡萄牙同D組首名出線嘅阿根廷雙雙殺入決賽，至於巴西同德國就會喺季軍戰碰頭：「呢場係復仇戰，所以我估巴西會贏！」
決賽要12碼分勝負
摩佬揀冠軍嘅時候顯得猶豫，就話呢場「C朗鬥美斯」嘅大戰會勁激烈：「加時、12碼、每隊11人都要射12碼，最後一球由美斯同C朗主射……剩低嘅由你哋想像啦！」摩佬指估波係一樣好玩嘅事，但佢就補多句話波係圓嘅，未到最後一刻都未知賽果係點：「呢啲嘢都話唔埋嘅，話唔定佢哋連16強都入唔到呢。」