建制派噚日喺立法會硬推被民主派批評為「割地自閹，立會廢權」嘅一地兩檢條例草案之際，建制派全部要坐定定等投票，佢哋又唔同民主派議員咁，要不時打醒精神準備同主席梁君彥死過，咁悶班建制派有乜搞作好？好似平日作風低調，卻試過因為喺立法會開會期間喪睇另一議員、白鴿黨黃碧雲資料，又用過google map「揸車」去天水圍而「成名」嘅勞工界議員「潘少」潘兆平，今次又有新搞作，而且仲魂遊得遠過去天水圍，佢就係投票期間狂睇明代太監鄭和下西洋嘅資料，唔知同審議緊嘅呢條「自閹」條例有乜關係？
話說今日立法會就民主派議員提出嘅修正案表決期間，有傳媒見到對住個電腦Mon睇得得相當專注嘅潘少，唔係睇緊一地兩檢資料或相關新聞，而係睇緊內地網站「知乎」一篇題為〈明朝在鄭和之後為甚麼不再有官方或者大規模的遠航甚至禁海？〉嘅文章，其後亦睇咗唔少鄭和下西洋圖片資料，似乎對「魂遊大海」好有興趣喎！
政助斬料預祝通過
另外，早前身兼一地兩檢條例草案委員會主席嘅新民黨主席葉劉淑儀同副主席張國鈞請食燒肉，預祝一地兩檢通過，噚日到運輸及房屋局政助符傳富請食燒肉，之前運房局請議員同記者食缽仔糕，俾葉劉話局方「出手低」，今次同葉劉一樣請食燒肉，葉劉應該收貨。