「喺馬路上，冠軍唔係第一，安全先係」，「牛下女車神」李慧詩告誡我哋踩單車同揸車一樣，要遵守交通法例。不過近日就有網民拍到有「單車友」疑似妄顧電車乘客安全，喺電車軌上、一架行駛緊嘅電車前「頭搖由尾擺」、左穿右插咁樣，非常之得戚。拍片人就不禁問，「尼度踩得架咩？」、「佢唔驚架？」、「係咪犯法架？」
片段喺fb專頁「馬路的事討論區」流傳，影片見到有兩個單車友，喺金鐘道的電車軌上踩單車，影片可見佢哋不單止冇戴頭盔，而且背後就係一部行駛緊嘅電車，其中一個單車友更加左穿右插，一度喺路軌上逆線行駛。拍片人都好詫異兩個單車友嘅行徑，「咁搞嘢嘅，唔驚架咩呵？」、「你睇吓佢好似好開心咁」。網民就一面倒聲討，話兩個單車友動作危險、靠害電車乘客咁話。
香港電車回覆《蘋果》話喺事後有收到車長報告話有人喺電車軌踩單車，又話公司有指導車長如果遇到突發情況，要保持冷靜。有需要可以停車聯絡控制室咁話，更加呼籲大家要遵守交通規則。
《蘋果》亦都問咗警察公共關係科，有關人士喺電車軌踩單車會唔會違反交通規例。警方話已經將查詢轉介去交通總部，截稿前《蘋果》未收到相關回覆。