灣仔老字號雲吞麵鋪宣佈執笠，報導中老闆娘自稱光榮結業，又話唔捨得街坊顧客，讀着除了淡淡一笑，只想起「曹操也有知心友」。熟悉的朋友都知道，我這個人雖然睇起嚟腌尖腥悶，但查實好易話為，飲食要求低得失禮，連美心集團過年應市的蘿蔔糕也食得津津有味，麥記翠華更從不嫌棄，港九新界去到邊食到邊，寧願餓暈拒絕幫襯的進餐地點，一隻手的手指數得完，此店乃其中之一。以往藝術中心及演藝學院散場，搭地鐵或電車回家前順道經過，偶爾會停下祭五臟廟，向來相安無事。五六年前有一晚，進店坐下未夠五秒，有個黑面神埋嚟問食乜，不知天高地厚的我答曰「唔該等等，我睇睇餐牌先」，誰不知這就犯了彌天大罪，待我決定叫一碟炸醬麵的時候，阿神塊面不但黑上加黑，而且仲借埋聾耳陳雙耳，直行直過當我透明，無論如何不肯高抬貴手寫單。試了兩次，不得要領，於是笑笑口起身離座，從此頭也不回。
一般人得到這種待遇，恐怕立即拍枱發爛渣，喜怒無常的基叔叔卻只會納罕：打開門做生意，使唔使咁巴閉，態度如此惡劣，就算真係啱啱䁥晌洗手間食咗屎，都不應該將臭味帶到樓面吧？繼而自我檢討：是否粗聲粗氣大呼小喝，損害了服務員的弱小心靈？呃，唔好意思，一介契弟縱使和青靚白淨有段距離，姐手姐腳有目共睹，何況還餓得七葷八素，根本直達侍兒扶起嬌無力境界，差一點就雲鬢花顏金步搖了，你話兇殘得去邊？至於該位神級阿姐是不是報導裏的第三代傳人，我研究了一輪照片仍然不能定奪：別的沒有學會，忘記討厭的面孔倒很在行。