墨西哥足總宣佈，國家隊主力中堅，25歲嘅迪亞高雷耶斯因傷退隊，呢位效力葡超波圖嘅守將緣盡世盃，意味陣中老將，現年39歲嘅馬基斯可以喺今屆世盃亮相嘅機會又大增，有望成為史上第三個、可以喺五屆世盃決賽周都上陣比賽嘅球員。
迪亞高雷耶斯因腿筋傷患，今個月墨西哥兩場世盃熱身賽對蘇格蘭同丹麥嘅比賽都冇辦法上陣，教練奧蘇里奧等到最後一刻，最後都要決定棄用呢個曾為墨西哥上陣53次嘅後防主力，並且補選中場艾歷古迪亞利斯，取代迪亞高雷耶斯嘅位置。雷耶斯退隊之後，墨西哥嘅中堅位置就只剩番曉高艾耶拉、赫達摩蘭奴、卡路士沙些度、艾臣奧馬艾華利斯同埋老將馬基斯，造就馬基斯呢個五朝元老有再喺世盃決賽周上陣嘅機會。