贏得1998年世界盃冠軍嘅法國隊周二重聚,並且喺施丹及亨利都有入球下,喺表演賽以3:2贏咗由雲格任教嘅1998明星隊。法國喺98年主場首次贏得世盃冠軍,20年後一眾功臣喺巴黎聚首,惟現任法國主帥迪甘斯因帶隊出戰俄羅斯,與同樣身在俄羅斯嘅查斯古特同告缺席。
今場表演賽,由積基特任主帥嘅法國盡遣當年贏世盃正選陣容嘅其中10人,門將巴夫斯,後衞杜林、白蘭斯、迪西里、利沙拉素,中場比堤、佐卡夫、施丹,前鋒亨利及古華治亦悉數上陣。至於由雲格領軍嘅1998明星隊,正選陣容包括前意大利門將托度、戴維斯、伊度奧、韋利、史杜捷哥夫等,後備陣容包括占士、文迪達、摩連迪斯、古華特及牙買加飛人保特,絕對係星光熠熠。