世盃今日就正式開戰喇，我求大俠睇過賽程，見到首輪勁隊多數深夜亮相，已經做足捱夜準備等睇好波，但法國首場波鬥澳洲個時間就幾好，夜晚六點就開波，可以喺公司睇埋先收工！不過開波前法國都多問題，基奧特日前爆頭之後，周二輪到基利安麥巴比受傷。呢隊被評為今屆世盃最值錢嘅球隊，認真多災多難。
球員總身價99億
基奧特喺對美國嘅熱身賽爆頭，對澳洲場分組賽都可能要紮住紗布出場，然後周二公開操練，再有今屆最強新星麥巴比喺場分組練習賽，被隊友阿爾拉米喺一次攔截中踢傷，之後痛苦倒地，係咁摸住左邊腳踝，而我哋《蘋果》派去俄羅斯做戰地直擊嘅兩位動記者，剛好入場睇法軍操練，亦畀佢哋拍到呢一幕，證實麥巴比要由工作人員攙扶出場外，提早結束操練。網上即刻傳出話呢位超新星已經打柴，可能要退出世盃大軍，但後嚟佢即刻喺社交網站澄清退隊傳聞，總算虛驚一場。
另外，仲有好多新聞包圍住高盧雄雞，好似基沙文聲稱已經諗好自己未來，《ESPN》就話佢留喺馬德里體育會成數高過轉會巴塞隆拿；另外，亦傳湯馬士林馬可能會代替基沙文，馬體會同摩納哥已經斟掂數，好快就會以破球會紀錄嘅8,000萬歐元轉會費，同呢位翼鋒簽約五年。
姑勿論呢啲消息真或假，甚至好或壞，但其實受咁多世盃以外新聞影響，對法國備戰決賽周都唔係好事。
據《轉會市場》評估，法國係家陣世界最有價值國家隊（見附表），全隊球員身價高達10.8億歐元（約99億港元），淨係基沙文、保羅普巴同麥巴比呢三位，加埋頭先話林馬嘅轉會費都去到8,000萬歐元，仲有基奧特、尼高路簡迪、費基亞同去年夏天都超咗一億歐元過巴塞嘅奧士文尼迪比利，都難怪佢哋加埋會仲高過西班牙、巴西同德國。
