「梁上有雙燕，翩翩雄與雌」，唐代詩人白居易一首《燕詩》，借燕子一生談孝。住喺元朗錦綉花園獨立屋嘅梁太，早前見屋企門口簷底有燕子築巢，特別安裝攝錄機，全天候記錄一對燕爸燕媽養育雛鳥嘅40日過程。梁太將剪輯好並配上旁白嘅精華影片放上網，旋即引來網民盛讚影片既溫馨又有意義。
落戶錦綉花園簷下
影片紀錄咗一對燕子爸媽喺今年3月底，落戶錦綉花園住戶梁宅屋簷下，燕子媽媽喺4月8日生下5隻鳥蛋。經燕子父母輪流孵哺，兩個幾星期後，至4月25日5隻雛燕相繼破殼而出，張口索食，燕子父母不停捕獵餵飼，仲為佢哋蓋上羽毛保暖。但至4月30日，巢中兩隻雛燕不幸夭折，燕子媽媽忍痛銜走兒屍。約一周後，幼燕開始長出深色羽毛，更開始學飛及捕獵食物。出世後不足一個月，乳燕喺5月17日離巢獨立遠飛。
梁太接受《蘋果》訪問時話，幾年前屋企裝修時，工人意外拆除一個鳥巢，佢擔心燕子歸來時無處容身，於是今年喺屋外一條橫樑下安裝一塊木板，希望燕子「慳啲力水、留力築個大巢，生多啲蛋」，終於吸引一對燕子築巢。
對於《燕詩》藉燕子說不孝，梁太又為幼燕「平反」，話最後唔係3隻乳燕拋棄父母，而係燕子媽媽又再養育第二胎，所以先趕走乳燕騰出鳥巢，第二胎幼燕就喺呢個星期一（11日）出世。呢段珍貴片段，就如現代版《燕詩》一幕幕上演……